5000 ԱՆՈՒՆ

5000 անուն, 5000 հոգի,

Հրեշտակ դարձած 5000 որդի։

Չբացված գարուն, չծաղկած ծաղիկ,

Պաղ, մարած օջախ, փուլ եկած տանիք:

Մեր խզված ձայնով ձեզ ասենք օրոր,

Որ հանգիստ ննջեք։

Չբացվեց նոր օր:

Չերգեց սոխակ, չծագեց արև:

Բողբոջած ծառին չբացվեց տերև:

Ընդհատված սպասում, կարկամած թախիծ,

Ժպիտներ միայն լուսանկարից:

Մի խոնավ ծաղիկ, մի վերջին համբույր,

Մի կապույտ երկինք, մի ծխի պարույր:

Արցունքոտ աղոթք, կիսախեղդ մի երգ,

Շշուկով խնդրանք. մեզ ներեք, տղերք:

Մի օղորմաթաս՝ արյունից էլ թունդ,

Փշրված մի սիրտ, մի կորած սերունդ:

Դեռ պիտի հառնի ջահը մեր մարած,

Մեր հոգու խորքում վրեժ ունենք պահած:

Դեռ կգա գարուն, կբացվի նոր օր;

Ձեր հոգիներին դեռ կիջնի անդորր:

01.03.2021

@ Գոհար Մարտիրոսյան (Նանա Ռոսս)